बाळासाहेब ठाकरे स्मृती राज्यस्तरीय एकांकिका स्पर्धेत बेनिफिट ऑफ डाउट, रंगबावरी, एका दशावतार एकांकिकांची बाजी… 

डोंबिवली :- ( शंकर जाधव )  शिवसेना नेते व ठाणे जिल्हा पालकमंत्री एकनाथ शिंदे यांच्या संकल्पनेतून साकारलेल्या बाळासाहेब ठाकरे स्मृती राज्यस्तरीय खुल्या एकांकिका स्पर्धेचा पारितोषिक वितरण सोहळा मंगळवारी रात्री ठाणे येथील गडकरी रंगायतन येथे पार पडला.या राज्यस्तरीय एकांकिका स्पर्धेत मिथक, मुंबई या संस्थेची ‘बेनिफिट ऑफ डाउट’ ही एकांकिका सर्वोत्कृष्ट ठरली. याच एकांकिकेसाठी ओंकार राऊतने सर्वोत्कृष्ट अभिनेत्याचा, तर ‘रंगबावरी’साठी कांचन माळी हिने सर्वोत्कृष्ट अभिनेत्रीचा पुरस्कार पटकावला.स्पर्धेच्या पुरस्कार वितरण सोहळ्यास प्रमुख पाहुणे म्हणून डॉ. ओक यांच्यासोबत ज्येष्ठ अभिनेत्री वंदना गुप्ते उपस्थित होत्या. ज्येष्ठ अभिनेते डॉ. गिरीश ओक, उदय सबनिस, अभिजीत खांडकेकर, अनिता दाते, भारती पाटील यांची विशेष उपस्थिती होती.

स्पर्धेच्या अंतिम फेरीचे प्रशिक्षक या नात्याने ज्येष्ठ अभिनेते अरुण नलावडे, नव्या पिढीचा दिग्दर्शक-अभिनेता अद्वैत दादरकर, विनायक दिवेकर, हर्षदा बोरकर आणि सुरेश मगरकर उपस्थित होते. याखेरीज पालकमंत्री एकनाथ शिंदे, ठाण्याच्या महापौर मीनाक्षी शिंदे, सभागृह नेते नरेश म्हस्के, कोल्हापूरचे आमदार राजेश क्षीरसागर, शिवसेनेचे महापालिकेतील गटनेते दिलीप बारटक्के, टॅगचे अध्यक्ष अशोक नारकर आदी मान्यवर उपस्थित होते. स्वा. सावरकर प्रतिष्ठान, जनसेवा प्रतिष्ठान, ठाणे आर्ट गिल्ड आणि शिवसेना चित्रपट सेना यांच्या सहआयोजनातून पार पडलेल्या या राज्यस्तरीय एकांकिका स्पर्धेत मिथक, मुंबई या संस्थेची ‘बेनिफिट ऑफ डाउट’ ही एकांकिका सर्वोत्कृष्ट ठरली. याच एकांकिकेसाठी ओंकार राऊतने सर्वोत्कृष्ट अभिनेत्याचा, तर ‘रंगबावरी’साठी कांचन माळी हिने सर्वोत्कृष्ट अभिनेत्रीचा पुरस्कार पटकावला. रंगबावरी (सेंट गोंसालो गार्सिया महाविद्यालय, वसई) आणि एका दशावतार (रुईया महाविद्यालय, मुंबई) या एकांकिकांनी अनुक्रमे द्वितीय आणि तृतीय पारितोषिक पटकावले. एका दशावतारसाठी प्राजक्त देशमुखने सर्वोत्कृष्ट लेखक आणि रणजीत पाटीलने सर्वोत्कृष्ट दिग्दर्शकाचा पुरस्कार पटकावला. आमचे आम्हीच, पुणे या संस्थेची ‘आय अॅॅग्री’ ही लक्षवेधी एकांकिका ठरली. प्रथम क्रमांकाच्या एकांकिकेस रु. १,००,०००/- आणि स्मृतिचिन्ह, द्वितीय क्रमांकास रु. ७५,०००/- व स्मृतिचिन्ह, तृतीय क्रमांकास रु. ५१,०००/- वस्मृतिचिन्ह, लक्षवेधी एकांकिकेस रु. ११०००/- व स्मृतिचिन्ह, सर्वोकृष्ट अभिनेता व अभिनेत्रीसाठी प्रथम रु. ११०००/-, द्वितीय रु. ५,०००/-, सर्वोकृष्ट दिग्दर्शक, सर्वोत्कृष्ट लेखक यांना रु. ११०००/- व स्मृतिचिन्ह, सर्वोकृष्ट प्रकाशयोजना,  संगीत, नेपथ्य, रंगभूषा,वेशभूषा अशा सर्वच विभागांसाठी प्रत्येकी रु. ५,०००/- व स्मृतिचिन्ह असे पुरस्कार देण्यात आले. याप्रसंगी उपस्थित तरुण रंगकर्मींना मार्गदर्शन करताना वंदना गुप्ते म्हणाल्या की, मराठी भाषेवर प्रेम करा, तुमच्या हातून आपसूक चांगली नाटके होतील. तरुण रंगकर्मींसाठी कार्यशाळा वगैरे आयोजित केली तरी मी नक्की येईन, असेही त्या म्हणाल्या. बाळासाहेबांच्या नावे ही स्पर्धा होत असल्याबद्दल त्यांनी आनंद व्यक्त केला. कलेवर, कलाकारांवर बाळासाहेबांचे प्रेम होते. त्यांना अगदी लहानपणापासून जवळून बघण्याची संधी मिळाली, असे त्यांनी सांगितले. अद्वैत दादरकर म्हणाले की, एकांकिका स्पर्धांमधून नवी ऊर्जा मिळते. स्वतःला पुन्हा तपासून बघता येते. अनेक नवे कल्पनाविष्कार इथे बघायला मिळतात. त्यामुळे ज्येष्ठ रंगकर्मींनीही एकांकिका स्पर्धांना उपस्थित राहाण्याची गरज आहे. ‘रंगभूमीकडून आजही ऊर्जा मिळते, त्यामुळे रंगभूमीची कास सोडू नका,’ असा सल्ला अरुण नलावडे यांनी दिला. बाळासाहेब स्वतः उत्तम कलावंत होते. कलांवर, कलाकारांवर त्यांचे प्रेम होते. अनेक कलाकारांच्या अडचणीच्या वेळी ते ठामपणे त्यांच्या पाठीशी उभे राहिले होते. त्यामुळे त्यांच्या नावाची ही स्पर्धा आयोजित करणे, हा आमचा बहुमान असल्याची भावना एकनाथ शिंदे यांनी व्यक्त केली. पुढल्या वर्षी अधिक भव्य स्वरुपात ही स्पर्धा आयोजित करण्यात येईल, असेही ते म्हणाले. कार्यक्रमाच्या  सूत्रसंचालनाची जबाबदारी दिग्दर्शक विजू माने यांनी सांभाळली.तर अभिनेते मंगेश देसाई यांनी आयोजकांच्या वतीने प्रास्ताविक केले. महेश शानबाग, श्रीरंग खटावकर, केदार बापट, केदार जोशी, अंबरिश ओक, विद्याधर ठाणेकर, दुर्गेश आकेरकर यांचे या स्पर्धेच्या आयोजनात विशेष सहकार्य लाभले.